اغلا بكثير

اغلا بكثير  ..♥

اغلا بكثير .. من لولو و الماس و حرير

عطيى من عطايا الرب عساه ما يوم يحرمني

لا صداقه ولا اخوه .. اكثر والله بكثير

اخاف عليهم وربي من عيوني احسدني

انا ما اموت فيهم بس انا اعشقهم بضمير

ما يغنيني عنهم شي كيف عنهم انا استغني

واثقه انهم نضر لو صار قلبي ضرير

ابد ما انخذل فيهم وممكن نفسي تخذلني

دعاء الجفري

تخرجنا

تخرجنا

سنين مرت و احنا قلوب بواحد صدر مجموعه

اذا يعطش منا قلب سقاه الكل من دمه

ولو واحد ضاقت فيه  الثاني فتح له ضلوعه

دارى حزنه و واساهـ و زاح باسه و همه

تعودنا نحس ببعض و حروف الصمت مسموعه

انطق حرف توأم روحي قبل ما ينطقه فمه

هدف واحد و جمعنا ومشى الكل على طوعه

نبي نجح و نتخرج وكل واحد وله حلمه

كم منا ارتقى قدره بثنية ظهره في ركوعه

يطلب ربي توفيقه , ودعوه حلوه من امه

و في عتمة ليالي الجهد اشعل بكفه شموعه

في داخله حلم ينبض ابد ما تقتله الظلمه

اول همومه كتابه ابدى من نومه و جوعه

تعبنا, سهرنا وانجزنا ..صحيح ذاكرنا بذمه

و في ليلة تخرجنا كلنا يعبر بدموعه  

من الفرحه من راحه و احلا مشاعر ملتمه

نص قلوبنا تضحك و النص الثاني موجوعه

نجحنا و هذا دوا القلب و نهاية عامنا سمه

بنشتاق لذكرى شدتنا وضحك و اشياء ممنوعه

قصص تونس و واستنا تحكيها الي ما تتسمه

ونشتاق يوم ننادي بعض يا شينه و يا دلوعه

كثير اشياء في ملامحنا من الاشواق منرسمه

اشتقنا للماضي قبل يفوت ياليت يعلن رجوعه

عسى الله لا يفرقنا , اخوهـ بمعنى الكلمه

دعاءا لجفري

طلة قمر

طلة قمر

يا عيون الناس والدنيا غضي النظر

عن جمال ماكان غير بكان يا مكان

ولا صلي ع الرسول يا عيون من حضر

يا عيون تجهل الحسن وبتشوفه الان

يشرق ببياض ثوبه طلته طلة قمر

تجمع حلو المحاسن وتوسدت انسان

يسمونه الدلال الجمال او ابرار بالمختصر

عروس اليوم وباكر وباقي الزمان

طلي الليله وعلمي كل البشر

ليه البدر من عيونك خجلان

وليه اقول حسنك ع البال ما خطر

وانتي ما بعد ضيك ضي بكل اوان

وبهالمكان القمر والشمس جمعهم قدر

وصاروا حياه او للحياه عنوان

يوم التقت ملاك الكون و اغلا الدرر

بالفارس الذي اتربه على الاحسان

طلي الليله وامشي على ورد وعطر

مع يوسف و قوليله مالت له الاغصان

غصن قلبك وغصن احلا الزهر

وغصن الهنا باذن الواحد المنان

علميهم انك هبه له بعد ما انتظر

من الله ويشهد الله انه اذا صان صان

اشرقي يا احلا عروس للي حضر

واحكي بطلة جمالك كل الي ماكان

دعاء الجفري 

هَيا

♥هيا

كل عام  و هِيا اغلا من على الدنيا انخلق

عيد ميلاد الليلة احلا و اروع هَيا 

كل عام و كل وردة ,في ايدها صارت ارق

وكل عذراء من حياها تاخذ اسلوب الحيا

من طيبها .. طيب البشر شوي ومنها انسرق

و اتوزع مثل ما صار في الذوق و في الحلا

ما اتكلم عن غلاها بس قلبي الي نطق

في عيونكم مجرد هَيا , وفي عيني كل الملا

دعاء الجفري

ست البنات

ست البنات

جات ع الدنيا طفله و النور منها انتشر

و الورد صار الليله يأخذ من خدها ألوانه

تفوح من شعورنا فرحه ويفوح منها العطر

وقرَّت الليله عيون تسعه شهور ولهانه

من الفرحه جدها ملت الدنيا زهر 

وصلى ع النبي ابوها قمر نايم باحضانه

هي نور في طفله أو ملاك من بشر 

عساها تكبر و تصبح مهديه و أروع انسانه

امها بضحكه تتحمد ربي و تردد شكر 

على بنوته بللفه .. محاره بوسطها دانه 

وخالتها من الفرحه تكتب فيها الشعر

يارب كبر و أحفظ ست البنات روزانه

دعاء الجفري

امي

♥ أمي

يا اغلا ما على الدنيا شافته عيني

منبع البسمه يا امي و يا كل الحنين

بايدينك زرعتيني واخذتيني من ايديني

وعساني فخرك الي تجنينه من سنين

رسمتي لي بدايتي وبحياتي عناويني

خليتي الادب ساسي وبنيتيني على دين

يا اجمل كلمه يا امي ويا جميل كاسيني

ما يوفيه كل عمري قولي بس وشتبين

ياول حب في قلبي وغلا يجري بشراييني

ونور يسكن عيوني, يساويك بحياتي مين؟

يا امي وجودك بس في هالدنيا يكفيني

ودفاه صوتك يوم انك بيابنتي تنادين

وبدونك بهالدنيا ابي اعرف انا ويني

من دونك لاهوا ,لا دوا.. ولا شي يزين

عساك تبقي لي دايم تعينني وتظميني

ياحضن لو يحتضن صخر من حنانك يلين

ابي رضاك يا امي وما غيره بيرضيني

ابيك دوم تدعيلي وانا دايم اقول امين

شوفي حصادك يا امي اهنيك وهنيني

من فرحك ابي فرحي ومن فرحتي تفرحين

يا اغلا ما على الدنيا شافته عيني

منبع البسمه يا امي و يا كل الحنين

لها ♥

  بعروقي جرا دمي

بها ♥ 

اقهر ظروفي و همي

و لو ..

 من حياتي اقدر اخذ ايام

و من الروح قطعه ..بعطيها ..

 واسهر لها ليلي ما انام

العين فراش و الرمش يغطيها..

و اخلق اعجوبه من حلو الكلام

مافي كلام  ينصفها و يوفيها ..

وخالقي ♥

 ما انخلق مثل امي

دعاء الجفري